Where to Buy our Free Range Eggs
Order directly from us by filling in this form Buy from Village Thyme (Open Wednesdays to Saturdays) Buy retail from Kwikspar Paul Roos Order for delivery, together with other great…
Huis Horison is 'n residensiële en beskuttewerk-sentrum in Stellenbosch wat op die holistiese versorging van mense met 'n primêre intellektuele gestremdheid fokus.
Die sentrum, wat op 'n kleinhoewe aan die voet van Papegaaiberg in die buitewyke van Stellenbosch lê, is in 1974 gestig en kan 102 mense huisves en versorg. Ons verskaf werk aan al die inwoners en 35 dagbesoekers.
Die inwoners het 'n behoefte aan omgee, groei, eiewaarde, sosialisering en verhoudings. Hulle het ook drome en hulle wil graag dinge doen. Maar hulle is weerloos. Daarom het hulle 'n geborge omgewing nodig waarin hulle tot hul reg kan kom.
Die inwoners word volgens hul intellektuele vermoëns en belangstelling by een van tien werkareas ingedeel. Só kan hulle deur handwerk, herwinning, herstelwerk, kosmaak, tuinwerk of iets anders in 'n beskutte omgewing werk en 'n sinvolle bydrae lewer. Terselfdertyd bied die werkareas terapeutiese waarde en al die voordele van 'n volwaardige werk – eiewaarde, erkenning, trots, sosiale samesyn, lewensgehalte en hoop.
Holistiese en kliëntgesentreerde diens word verskaf deur die personeel van Huis Horison, instrukteurs, mediese personeel en 'n maatskaplike werker. Daar word omgesien na hul ontspanning, geestelike behoeftes en persoonlike ontwikkeling. Ons ondersteun ook hul ouers en families.
Huis Horison is 'n maatskappy sonder winsbejag wat vir sy eie befondsing verantwoordelik is. Om die sentrum finansieel volhoubaar te kan bedryf, moet ons ons inkomste aanvul deur donasies, fondsinsamelings, funksies, verkope en nalatenskappe uit testamente.
